घोराही, २३ साउन । घोराही – लमही सडक खण्डअन्तर्गत रहेको मसोट पुलको मर्मत कार्य अन्तिम चरणमा पुगेको छ । लामो समयदेखि कमजोर अवस्थामा रहेको सो पुलको मर्मत कार्य सम्पन्न हुन लागेसँगै अब भोलिदेखि पुलमार्ग हुँदै सवारीसाधन सञ्चालनमा आउने भएका छन् ।
शुक्रवार बिहान घोराही उपमहानगरपालिकाका नगरप्रमुख नरुलाल चौधरीले पुल क्षेत्रको स्थलगत निरीक्षण गर्नुभयो । निरीक्षणका क्रममा उहाँले पुल निर्माणमा संलग्न इन्जिनियर तथा प्राविधिकहरूसँग कार्य प्रगति, प्रयोग गरिएका सामग्री र प्रविधिबारे जानकारी लिनुभयो । उहाँले मर्मतको अन्तिम चरणको कार्य पनि शीघ्र र गुणस्तरीय रूपमा सम्पन्न गर्न निर्देशन दिनुभयो ।
“यो पुल पुरै दाङका नागरिकको दैनिक जीवनसँग प्रत्यक्ष जोडिएको संरचना हो,” नगरप्रमुख चौधरीले भन्नुभयो, “त्यसैले काम ढिलासुस्ती र असावधानीपूर्वक हुनु हुँदैन । स्थायित्वमा ध्यान दिनुपर्छ ।”
नगरप्रमुख चौधरीले पुल निर्माणको सम्पूर्ण प्रक्रिया पारदर्शी र उत्तरदायी बनाइनुपर्नेमा जोड दिनुभयो । साथै, भोलिदेखि पुल सञ्चालनमा आउने भएपछि सवारीचालकहरूलाई सुरक्षाका मापदण्ड अपनाउन र सर्तक रहन आग्रह गर्नुभयो ।
इन्जिनियरहरूका अनुसार पुलको प्रमुख संरचनात्मक भागहरूको मर्मत कार्य सम्पन्न भइसकेको छ भने बाँकी रहेको सतहको फिनिसिङ कार्य आजै सम्पन्न गरिनेछ । मर्मतपछि पुलले झनै सुदृढता हासिल गर्ने र भविष्यमा लामो समयसम्म टिकाउ हुने उनीहरूको विश्वास छ ।
यस पुलको मर्मत कार्य सुरु भएपछि घोराही–लमही सडक भएर सञ्चालन हुने सवारी साधनहरू डाइभर्सन प्रयोग गर्न बाध्य भएका थिए । अब पुल खुलासँगै यात्रु तथा व्यवसायिक सवारीहरूलाई ठूलो सहजता मिल्नेछ ।
