गणतन्त्र समाचारदाता
घोराही, १८ साउन । घोराही उपमहानगरपालिकाले नगरबासीको गुनासो, सुझाव र सल्लाहलाई सुन्दै वार्षिक सार्वजनिक सुनुवाइ सम्पन्न गरेको छ ।
घोराही उपमहानगरपालिकाले नगर स्तरीय वार्षिक सार्वजनिक सुनुवाइ गरेको छ । आर्थिक वर्ष २०८१–०८२ को वार्षिक योजना, कार्यक्रम, बजेट तथा सार्वजनिक सेवा प्रवाहको प्रभावकारितालगायत विषयमा आइतबार नगरस्तरीय वार्षिक सार्वजनिक सुनुवाइ गरिएको हो ।
नगर प्रमुख नरुलाल चौधरीको अध्यक्षतामा सम्पन्न सार्वजनिक सुनुवाइमा नगरबासीले समृद्ध उपमहानगर बनाउन पालिकाले लिएको नीतिलाई थप प्रभावकारी बनाउँदै लैजान सुझाव दिएका छन् ।
नगरबासीले केही स्थानमा निर्माणाधीन भौतिक पूर्वाधारमा देखिएको ढिलासुस्तीले सास्ती भोग्नु परेको भन्दै चाँडो काम सम्पन्न गर्न आग्रह गरेका थिए । यसैगरी, संघ र प्रदेश सरकारका योजना कार्यान्वयनमा पालिकाले समन्वय गर्नुपर्नेमा ध्यानाकर्षण गराएका थिए भने बहुवर्षीय योजनालाई नगरबासीको जीवनसँग जोडेर लैजान आग्रह गरेका थिए ।
विद्यार्थीहरुले बालमैत्री पालिकामा बालबालिकाको आवाज सुन्ने वातावरण बनाउन, पर्याप्त पुस्तकालयको व्यवस्था गर्न आग्रह गरे । संस्कारयुक्त शिक्षामा जोड दिँदै बालबालिकामा सकारात्मक सोचको विकास गर्न सचेतना तथा उत्प्रेरणात्मक कार्यक्रम विद्यालय तहमा व्यापक बनाउन अभिभावकहरुले सुझाव दिएका छन् ।
शिक्षक दरबन्दी मिलान चाँडो गरी पठनपाठन प्रभावकारी बनाउन, महिला स्वास्थ्य स्वयंसेविकाको समस्या सम्बोधन गर्न पनि सहभागीहरुले पालिकाको ध्यानाकर्षण गराएका छन् ।
कार्यक्रममा फोहरमैला व्यवस्थापनका लागि निर्धारण गरिएको कर व्यवहारिक तथा वैज्ञानिक बनाउनुपर्ने सुझाव राखिएको थियो भने बहिरा समुदायले आफ्ना सवालमा गम्भीर हुन पालिकालाई आग्रह गरेका थिए ।
समाजका लागि सञ्चार पैरवी नेपालको सहकार्यमा आयोजना गरिएको सार्वजनिक सुनुवाइमा नगर प्रमुख चौधरी, उपप्रमुख हुमाकुमारी डिसी, प्रमुख प्रशासकीय अधिकृत ऋषिराम केसीले सहभागीबाट आएका प्रश्न, जिज्ञासा र गुनासोहरुको सम्बोधन गर्नुभएको थियो । नगरबासीको पहुँचमा पुग्न नियमित सार्वजनिक सुनुवाइमार्फत पालिकाले गरिरहेका कामबारे जानकारी गराउने र समस्या सुझावका रूपमा लिने काम हुँदै आएको जवाफदेही वक्ताहरुले स्पष्ट पार्नुभयो ।
नगर प्रमुख चौधरीले फोहर कर वैज्ञानिक र व्यवस्थित बनाउन पालिकाले आवश्यक गृहकार्य गर्ने बताउँदै सरसफाइका कार्यक्रम टोल टोलमा व्यापक बनाउँदै लैजान आग्रह गर्नुभयो । सडक तथा बाटो मर्मतको काम सडक बोर्डमार्फत हुने जानकारी पनि उहाँले दिनुभयो ।
शिक्षामा गुणस्तर सुधार, स्वास्थ्य सेवा प्रवाह प्रभावकारी बनाउने, कृषि तथा युवा उद्यमशीलता लगायतका क्षेत्रमा परिणाममुखी काम भइरहेको उपप्रमुख डिसीले बताउनुभयो ।
कार्यक्रममा पालिकाका सूचना अधिकारी भीमबहादुर चौधरीले पालिकाको वार्षिक प्रगति विवरण प्रस्तुत गर्नुभएको थियो । उहाँले नगरको कुल बजेटको ७७ दशमलब ६७ प्रतिशत खर्च भएको जानकारी दिनुभयो ।
सार्वजनिक सुनुवाइमा पालिकाको सेवा प्रवाहका सम्बन्धमा तयार पारिएको नागरिक अभिमत, सेवा लिँदा नागरिकले भोगेका अनुभव समेटिएको प्रतिवेदन नवीन चौधरीले प्रस्तुत गर्नुभएको थियो ।
सार्वजनिक सुनुवाइ कार्यक्रममा कार्यपालिका सदस्य, वडा अध्यक्ष, महाशाखा तथा शाखा प्रमुख, वडा सचिव, टोल विकास संस्था, स्वास्थ्य स्वयंसेविका, शिक्षक, विद्यार्थी, नागरिक अगुवालगायतको उपस्थिति रहेको थियो ।
