घोराही, १२ साउन । घोराही उपमहानगरपालिकाले आर्थिक वर्ष २०८१/८२ को नगरस्तरीय बार्षिक प्रगति समीक्षा कार्यक्रम सम्पन्न गरेको छ । नगरप्रमुख नरुलाल चौधरीको अध्यक्षतामा भएको कार्यक्रममा नगर उपप्रमुख हुमाकुमारी डिसी, प्रमुख प्रशासकीय अधिकृत ऋषिराम केसी, कार्यपालिका सदस्यहरू, वडा अध्यक्षहरू, महाशाखा र शाखा प्रमुखहरू, वडा सचिवहरूको सहभागिता रहेको थियो । समीक्षा कार्यक्रममा महाशाखा, शाखा र वडाहरूले वर्षदिनमा गरेका प्रगति विवरणहरू प्रस्तुत गरेका छन् ।
दुई दिनसम्म चलेको समीक्षामा नगरको कुल बजेटको ७७.६७ प्रतिशत खर्च भएको छ । गत आर्थिक वर्षमा प्रस्तावित २ अर्ब ३३ करोड ८२ लाख ३२ हजार २५० रुपैयाँ बजेटमा १ अर्ब ८६ करोड २६ लाख २५ हजार ९७ रुपैयाँ वास्तविक बजेट कायम भएको थियो । वास्तविक बजेटमा १ अर्ब ८१ करोड ६२ लाख ३५ हजार ९२२ रुपैयाँ खर्च भएको छ । लुम्बिनी प्रदेश सरकारबाट विभिन्न शीर्षकमा प्राप्त ३ करोड ६४ लाख ६२ हजार रुपैयाँमा २ करोड ८९ लाख ९६७ रुपैयाँ अर्थात् ७९.२६ प्रतिशत खर्च भएको जानकारी कार्यक्रममा दिइएको छ ।
सङ्घीय सशर्त अनुदानबाट प्राप्त ८७ करोड ३९ लाख ४९ हजार रुपैयाँमा ७३ करोड ९७ लाख ९६ हजार ३९४ रुपैयाँ अर्थात् ८५.६२ प्रतिशत खर्च भएको छ । नगरस्तरीय राजस्वबाट सङ्कलित ३८ करोड ८६ लाख ३१ हजार ७५० रुपैयाँमा ३० करोड ८७ लाख ७५ हजार ७२१ रुपैयाँ अर्थात् ७९.४५ प्रतिशत खर्च भएको छ ।
कार्यक्रममा नगरप्रमुख नरुलाल चौधरीले समग्र नगरवासी, जनप्रतिनिधि, कर्मचारी तथा सरोकारवाला निकायको सहयोगले योजनाहरू कार्यान्वयन भएकोमा धन्यवाद व्यक्त गर्नुभयो । नगरले शिक्षामा गुणस्तर सुधार, स्वास्थ्य सेवा प्रवाह, सडक सञ्जाल विस्तार, खानेपानी तथा सरसफाइ, कृषि र युवा उद्यमशीलता लगायतका क्षेत्रमा उल्लेखनीय उपलब्धि हासिल गरेको उहाँले बताउनुभयो । जनताको विश्वासलाई केन्द्रमा राख्दै हरेक योजनामा पारदर्शिता र सहभागितालाई जोड दिएको उहाँले उल्लेख गर्नुभयो । “स्थानीय सरकारको मूल जिम्मेवारी भनेकै जनताको सेवा हो, त्यसलाई हामी सबै मिलेर प्रभावकारी बनाउँदै लैजानेछौँ,” नगरप्रमुख चौधरीले भन्नुभयो । सेवा प्रवाहलाई प्रभावकारी, उत्तरदायी र जनमुखी बनाउन पारदर्शिता, गुणस्तर र जवाफदेहितामा विशेष ध्यान दिन उहाँले सुझाव दिनुभयो । पालिकाको नियमित कार्य सम्पादन र योजनाको प्रभावकारी कार्यान्वयनका लागि कर्मचारीहरूलाई जिम्मेवार, इमानदार र जनउत्तरदायी भएर काम गर्न आग्रह गर्नुभयो ।
नगर उपप्रमुख हुमाकुमारी डिसीले प्रशासनिक संरचनाले जनताको हितमा काम गर्न नसके जनता र सरकारबीचको विश्वास गुम्ने खतरा रहेको बताउँदै जनताले अनुभव गर्न सक्ने गरी सेवा प्रवाह गर्नुपर्ने धारणा राख्नुभयो । उहाँले पालिकाले सञ्चालन गर्ने योजना, कार्यक्रम र सेवा वितरणका सबै पक्षमा पारदर्शिता कायम गरी अनियमितता र ढिलासुस्ती अन्त्य गर्नुपर्नेमा जोड दिनुभयो ।
प्रमुख प्रशासकीय अधिकृत ऋषिराम केसीले नगरवासीलाई नतिजामुखी सेवा प्रदान गर्नुपर्ने बताउँदै समग्र विकासमा योजनाको प्रभावकारिता, स्रोतको सही उपयोग र जनसहभागिताको सन्तुलन अत्यन्त महत्त्वपूर्ण हुने उल्लेख गर्नुभयो । कर्मचारी र जनप्रतिनिधिबीचको समन्वय, सहकार्य र आपसी विश्वासबाट मात्र समृद्ध उपमहानगर बनाउने लक्ष्य हासिल हुने बताउँदै सबै कर्मचारीलाई सकारात्मक सोच, लगनशीलता र उत्तरदायित्वका साथ कार्य सम्पादन गर्न आग्रह गर्नुभयो ।
सूचना तथा सञ्चार प्रविधि शाखाको आयोजनामा भएको कार्यक्रमको सहजीकरण तथ्याङ्क अधिकृत भीमबहादुर चौधरी र सूचना प्रविधि अधिकृत विमल अग्रहरीले गर्नुभएको थियो ।
