तुलसीपुर, ७ साउन । ४७ औं पुष्पलाल श्रेष्ठ स्मृति दिवसको अवसरमा नेकपा (एमाले)ले तुलसीपुरमा अन्तरक्रिया तथा श्रद्धाञ्जली कार्यक्रम आयोजना गरेको छ । नेकपा एमाले दाङले पार्टी कार्यालय तुलसीपुरमा अन्तरक्रिया कार्यक्रम सम्पन्न गरेको हो भने तुलसीपुर उपमहानगरपालिका कमिटीले पुष्पलाल उद्यानमा श्रद्धाञ्जली कार्यक्रम गरेको हो ।
अन्तरक्रिया कार्यक्रममा बोल्ने वक्ताहरूले तत्कालीन समयमा पुष्पलालले अगाडि सारेका विचार र नीतिहरू अहिले पनि उत्तिकै सान्दर्भिक रहेकोमा जोड दिएका थिए । कार्यक्रममा प्रमुख अतिथि नेकपा (एमाले)का केन्द्रीय सदस्य भागवत विश्वासीले जनताको मुक्तिका लागि पुष्पलालले आफ्नो व्यक्तिगत जीवनलाई कुर्बानी दिएको बताउनुभयो । “अहिले पनि देश पुष्पलालले देखाएको बाटोमै छ,” उहाँले भन्नुभयो ।
कार्यक्रममा नेकपा एमाले केन्द्रीय निर्वाचन आयोगका सदस्य हिराचन्द्र केसी, केन्द्रीय अनुशासन आयोगका सदस्य छविलाल वली, केन्द्रीय परिषद सदस्यद्वय राममणि नेपाली र ढुण्डिराज लामिछाने, प्रदेश सचिव लक्ष्मण आचार्य, प्रदेश सदस्यहरू हुकुमबहादुर बस्नेत, सुरमणि बेल्वासे, रेखा शर्मा लगायतले मन्तव्य व्यक्त गर्नुभएको थियो । नेकपा एमाले दाङका कार्यवाहक अध्यक्ष मनोहर बुढाथोकीको अध्यक्षतामा सम्पन्न कार्यक्रमको सञ्चालन जिल्ला सचिव स्याम डाँगीले गर्नुभएको थियो ।
त्यसैगरी तुलसीपुर उपमहानगरपालिका कमिटीले पुष्पलाल उद्यानमा आयोजना गरेको श्रद्धाञ्जली कार्यक्रममा नेताहरूले पुष्पलालले अगाडि सारेका विचारहरू अहिले झन् सान्दर्भिक रहेको धारणा राखेका थिए । नगर अध्यक्ष रूपबहादुर खत्रीको अध्यक्षतामा तथा नेकपा एमाले निर्वाचन आयोगका केन्द्रीय सदस्य हिराचन्द्र केसीको प्रमुख आतिथ्यतामा सम्पन्न उक्त कार्यक्रममा तुलसीपुर उपमहानगरपालिका प्रमुख टिकाराम खड्काले पनि मन्तव्य व्यक्त गर्नुभएको थियो । कार्यक्रममा सचिव जितबहादुर खड्काले सहजीकरण गर्नुभएको थियो ।
