पत्रकार महासंघ रुकुम पश्चिमद्वारा सञ्चारमन्त्री समक्ष १२ बुँदे माग

रुकुम पश्चिम, मङ्सिर १७ गते । भूकम्प प्रभावित क्षेत्रका संचारकर्मी, सञ्चारमाध्याम र दुरसञ्चारको अवस्था निरीक्षणको लागि रुकुमपश्चिम आईपुग्नुभएकी सञ्चार तथा सूचना प्रविधिमन्त्री रेखा शर्मा समक्ष १२ बुँदे माग पत्र पेश गरिएको छ ।

नेपाल पत्रकार महासंघ रुकुमपश्चिम शाखाले भूकम्प प्रभावित पत्रकार र सञ्चारमाध्यामहरुको हितका लागि माग पत्र पेश गरेको हो । आईतबार महासंघका जिल्ला अध्यक्ष लक्ष्मण केसीले मन्त्री शर्मालाई माग पत्र पेश गर्नुभएको हो ।

कोरोना महामारीको चपेटामा परेको संचार क्षेत्र भूकम्पको थप विपद्मा परेकोले यसको सामना गर्न सरकारका तर्फबाट उचित कदम चाल्न माग पत्र पेश गरेको अध्यक्ष केसीले जानकारी दिनुभयो । उहाँका अनुसार सञ्चार तथा सूचना प्रविधिमन्त्री शर्मा समक्ष भूकम्पबाट क्षति पुगेका संचार माध्यामको भवन निर्माण र उपकरण खरिदमा सहयोग र भूकम्प प्रभावित पत्रकारहरुलाई सहुलियत दरमा उपकरण खरिदको व्यवस्था गरिदिन माग गरिएको छ । त्यसैगरी भूकम्प प्रभावित क्षेत्रका सञ्चार माध्यामहरुको नविकरणमा लाग्ने शुल्क छुट गरिदिन र सूचना विभागद्वारा यस क्षेत्रमा घुम्ती शिविर सञ्चालन गर्ने व्यवस्थाका लागि महासंघले माग गरेको छ ।
महासंघ रुकुमपश्चिम शाखाले कर्णाली प्रदेशका सञ्चारकर्मीहरुको क्षमता अभिबृद्धि तथा सञ्चार माध्यामको सबलिकरणका लागि बिशेष प्याकेजको माग गरेको छ भने प्रभावित क्षेत्रका सञ्चार माध्यामलाई ईन्टरनेट र बिद्युत सेवा निशुल्क गरिदिने व्यवस्थाका लागि समेत माग गरेको छ ।

प्रभावित पत्रकारहरुको लागि मनोसामाजिक सेवा लक्षित कार्यक्रम, फेलोसिप लक्षित कार्यक्रम, पत्रकारहरुको स्वास्थ्य र दुर्घटना बिमाको निरन्तरता, जिल्लाका विज्ञापनहरु स्थानीयस्तरका मिडियालाई नै दिनुपर्ने नीतिगत व्यवस्थाको माग पनि गरिएको छ ।

जिल्ला अध्यक्ष केसीले पत्रकारहरुको न्युनतम पारिश्रमिक राज्यले कडाईका साथ लागु गर्नुपर्ने र अनलाईन मिडियाहरुको उचित व्यवस्थापन तथा लोककल्याणकारी बिज्ञापनको लागि पहल गरिदिन माग गरेको जानकारी दिनुभयो ।
जिल्लामा आठ वटा रेडियो, दुई वटा साप्ताहिक पत्रिका, एक वटा मासिक पत्रिका, चार वटा अनलाईन मिडिया सञ्चालनमा रहेको बताईएको छ । भूकम्पको कारण ३० जना पत्रकार प्रभावित भएको, एक वटा रेडियो पूर्ण रुपमा क्षति भएको अध्यक्ष केसीले जानकारी गराउनुभएको छ ।
माग पत्र बुझ्नुहुँदै मन्त्री शर्माले सबै मागहरु सकारात्मक रहेकोले पुरा गर्नको लागि आवश्यक सहजिकरण गर्ने प्रतिबद्धता व्यक्त गर्नुभयो ।
यसैबिच पत्रकार महासंघलाई प्राप्त सामाग्रीहरु आजै नै वितरण गरिएको छ । पत्रकार महासंघ रुकुम पश्चिमका अध्यक्ष लक्ष्मण केसीले प्रभावित र प्रभावित क्षेत्रमा रिपोटिङ्ग गर्ने पत्रकारहरुलाई प्रथामिकता दिएर ती सामाग्रीहरु हस्तान्तरण गरिएको बताउनुभयो । भूकम्पको कारण जिल्लामा ३० बढी पत्रकार प्रभावित र एक वटा रेडियो पूर्ण रुपमा क्षति भएको छ ।

[reactionpoll]
प्रतिक्रिया 0

प्रतिकृया दिनुहोस्

Your email address will not be published. Required fields are marked *